Aos que desfrutáchedes (ou desfrutades) o Final Fantasy VII tanto ou máis ca min, isto seguro que vos pasou algunha vez. Coma moita xente, ás veces, cando estou distraído ou entretido con algo, sáenme de xeito espontáneo certas melodías polos beizos. Normalmente dalgún tema que escoitara recentemente ou dos que teño sempre na cabeza como "intocables". Pois ben, o caso é que un día levaba eu un bo anaco tatarexando unha melodía con certo sabor rockeiro, de feito, ao principio coidaba que era un tema de Dream Theater, polo toque guitarreiro, mais foi unha grande sorpresa para min decatarme de que estaba errado. Era unha melodía do FFVII, das que aparecen moito ao longo do xogo (neste caso no HurryUP), e eu estaba alí, concentrado noutras cousas e poñéndome banda sonora. Se cadra foi un mecanismo innato da mente para, dalgún xeito, meterme présa e rematar dunha vez o que estaba a facer. O feito, como cabería esperar, repetiuse varias veces máis ao longo dos días seguintes. A melodía non saía da miña testa, era como cando o verán contamina o teu bo gusto con "cancións" que te golpean a cabeza día e noite, salvando as distancias claro está. Foi ahí cando acudín na procura de axuda, meus amigos Google e Wikipedia ofrecéronme de xeito amable o seu consello e descubrín que non era o único. Resulta que hai xente que da concertos multitudinarios tocando eses temas e polo tanto, público que tatarexará os temas dos que máis goste no baño, no bus, etc. Xa non era o único. O grupo en cuestión chámase The Black Mages (aos seguidores de FF seguro que vos soa o nome), e o seu lider (o do mostacho) é Nobuo Uematsu, que é o compositor dos temas de toda a saga Final Fantasy. É sorprendente ver o diferente que é Xapón ao resto do mundo, non me imaxino a este grupo de xira por estes lares, aínda que a experiencia podería ser positiva, polo menos para min, así xa non estaría preocupado por tatarexar melodías de videoxogos para me dar présa en facer as cousas.
O grupo en cuestión soa ben e a posta en escena é imponente, non sei que opinará o Moucho que é máis docto en temas de Rock progresivo. Dubído que achen un oco no seu canon de bandas de culto, pero o certo é que soar, soan ben.
Collín prestado de YouTube este vídeo, que aínda que non ten moi boa calidade de imaxe, permite ver o que falaba antes. O coro de Sephiroth é un puntazo.
Que o desfrutedes.
Etiquetas: Música, Videoxogos
Que grandísimo post, amigo pastor!
Comentar antes de nada que Final Fantasy son verbas que me chegan á alma. Considero a VII entrega o mellor videoxogo xamais realizado. Pero non remata aí a cousa. Este nadal rematei de gañar sona de friki cando acertei unha resposta no trivial que ninguén sabía, que non era outra que quen compuña a banda sonora da saga de xogos "Final Fantasy"... Como non ía coñecer a Nobuo Uematsu cando é dos poucos xogos que gañaron a grande honra de non precisar baixar o volume para seperpoñer música verdadeiramente épica!... Merquei a banda sonora orixinal de FFVII en norma cando aínda estaba na coruñesa rúa de san andrés, directamente importadiña de xapón. Os FF son moito mais que xogos, levan moito mais aló que calquera outra saga a creación de aventuras épico-fantásticas verdadeiramente colosais que co paso dos anos lembras coma se fosen boas películas... por certo, o VIII tivo tamén algún tema coral para gozalo. Agora estou xa xogando ao XII, que merquei relixiosamente o venres, no día en que saía no mercado español con moitísimo retraso, e a música anque non é de Uematsu camiña sobre os lugares comúns trazados por este. Tanto tanto, que a sintonía inicial é a mesma que a de precisamente FFVII.